Молитвы Прп. Макарий Молебен прп. Макарию
Обновлено 13.06.2010 07:32 Автор: Admin 28.12.2007 13:13
МОЛЕБЕН ПРЕПОДОБНОМУ И БОГОНОСНОМУ ОТЦУ НАШЕМУ МАКАРИЮ ЖЕЛТОВОДСКОМУ, УНЖЕНСКОМУ И СВИЯЖСКОМУ ЧУДОТВОРЦУ
Иерей: Благословен Бог наш…
Лик: Аминь. Слава Тебе, Боже наш, слава Тебе. Царю Небесный…
Чтец: Трисвятое по Отче наш.
Иерей: Яко Твое есть Царство…
Чтец: Аминь. Господи, помилуй - 12 р. Слава и ныне.
Приидите, поклонимся Цареви нашему Богу.
Приидите, поклонимся и припадем Христу Цареви нашему Богу.
Приидите, поклонимся и припадем Самому Христу, Цареви и Богу нашему.
142 псалом:
Господи, услыши молитву мою, внуши моление мое во истине Твоей, услыши мя в правде Твоей, и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой; посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце моя, душа моя яко земля безводная Тебе. Скоро услыши мя, Господи: исчезе дух мой; не отврати лица Твоего от мене, и уподоблюся нисходящим в ров. Слышану сотвори мне заутра милость Твою, яко на Тя уповах. Скажи мне, Господи, путь, воньже пойду, яко к Тебе взях душу мою. Изми мя от враг моих, Господи; к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя; правдою Твоею изведеши от печали душу мою; и милостию Твоею потребиши враги моя, и погубиши вся стужающия души моей, яко аз раб Твой есмь.
Слава и ныне: Аллилуиа (трижды)
Бог Господь и явися нам, благословен Грядый во имя Господне.
Исповедайтеся Господеви, яко благ, яко в век милость Его.
Обышедше обыдоша мя, и именем Господним противляхся им.
Не умру, но жив буду, и повем дела Господня.
Камень, егоже небрегоша зиждущии, сей бысть во главу угла: от Господа бысть сей, и есть дивен во очесах наших.
Днесь Свияжская обитель тобою хвалится, в концех бо ея пресветло яко велие солнце возсиял еси, и чудесы твоими, преподобне Макарие вся озарил еси. И ныне молися Господеви, избавитися душам нашим от прелести вражия, и спастися обители твоея от поганскаго наития. (Дважды)
Слава и ныне, гл. 4:
Не умолчим никогда, Богородице, силы Твоя глаголати недостойнии, аще бо Ты не бы предстояла молящи, кто бы нас избавил от толиких бед. Кто же бы сохранил доныне свободны. Не отступим, Владычице, от Тебе, Твоя бо рабы спасаеши присно от всяких лютых.
Чтец: 50-ый псалом:
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззакония моя аз знаю и грех мой предо мною есть выну. Тебе Единому согреших, и лукавая пред Тобою сотворих, яко да оправдишися во словесех Твоих и победиши, внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твой. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на олтарь Твой тельцы.
1, 3 песни
Припев: Преподобне отче наш Макарие, моли Бога о нас.
Слава и ныне.
По 3-й песни припев.
Моли Бога о нас, преподобне отче наш Макарие, яко мы усердно к тебе прибегаем, скорому помощнику и молитвеннику о душах наших.
Малая ектиния.
Диакон: Паки и паки миром Господу помолимся.
Лик: Господи, помилуй.
Диакон: Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.
Иерей: Яко Милостив и Человеколюбец Бог еси, и Тебе славу воссылаем, Отцу и Сыну и Святому Духу, ныне и присно и во веки веков. Аминь.
Лик: Аминь.
4,5,6 песни
По 6-й песни припевы как по 3-й.
Малая ектения.
Акафист
Диакон: Вонмем! Премудрость!
Прокимен, глас 4: Честна пред Господем смерть преподобных Его.
Стих: Терпя потерпех Господа и внят ми и услыша молитву мою.
Иерей: Господу помолимся.
Лик: Господи, помилуй.
Иерей: Яко свят еси, Боже наш, и во святых почиваеши, и Тебе славу возсылаем. Отцу и Сыну и Святому Духу, ныне и присно и во веки веков.
Лик: Аминь.
Диакон: Прокимен, глас 4: Всякое дыхание да хвалит Господа.
Стих: Хвалите Бога во святых Его, хвалите Его во утверждении силы Его.
Диакон: И о сподобитися нам слышанию Святаго Евангелия, Господа Бога молим.
Лик: Господи, помилуй. (Трижды)
Диакон: Премудрость, прости! Услышим Святаго Евангелия.
Иерей: Мир всем.
Лик: И духови твоему.
Иерей: От Матфея святаго Евангелия чтение:
Лик: Слава Тебе, Господи, слава Тебе.
Диакон: Вонмем
Иерей: Рече Господь Своим учеником: Вся Мне предана суть Отцем Моим, и никтоже знает Сына токмо Отец, ни Отца кто знает токмо Сын, и емуже аще волит Сын открыти. Приидите ко Мне вси труждающиеся и обремененнии, и Аз упокою вы. Возьмите иго Мое на себе, и научитеся от Мене, яко кроток есмь и смирен сердцем, и обрящете покой душам вашим. Иго бо Мое благо и бремя Мое легко есть.
Лик: Слава Тебе, Господи, слава Тебе.
7, 8, 9 песни
Лик: Достойно есть, яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Чтец: Трисвятое по Отче наш.
Лик:
Кондак прп. Макарию, гл. 2:
Вторый Моисей явился еси, преподобне: он бо жезлом море раздели, ты же страсти яко амалика победил еси, и непроходную пустыню немятежным умом прошел еси, в нейже молитвами твоими велие чудо сотворил еси, гладныя люди до изобилия прекормил еси. И ныне молися Господеви, подати всем печальным утешение, Макарие отче приснопамятне, иже Свияжстей обители, и всей Российстей земли похвала и утверждение.
Сугубая ектения.
Диакон: Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (трижды на каждое прошение).
Еще молимся о Великом Господине и Отце нашем Святейшем Патриархе Алексии, и о Господине нашем Высокопреосвященнейшем архиепископе Анастасии, Священноархимандрите святыя обители сея, и о всей во Христе братии нашей.
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Еще молимся о милости, жизни, мире, здравии, спасении, посещении, прощении и оставлении грехов рабов Божиих, Всечестнаго отца нашего священноигумена Глеба с братией святыя обители сея, и о еже во здравии умножити лета живота их.
Еще молимся за всю братию и за вся православныя христианы.
Лик: Аминь.
Перед молитвой: Преподобне отче, Макарие, моли Бога о нас.
Молитва.
О преподобне и богоносне отче наш Макарие! Веруем, яко ты, предстоя престолу Пресвятыя Троицы, велие имаши дерзновение в молитвах ко Всемилостивому Господу Богу, Иже всегда послушает тебе, вернаго раба и угодника Своего. Сего ради со умилением смиренно припадаем к тебе, святче Божий, не премолчи о нас молитися ко Господу Богу, в Троице покланяемому и славимому, да милостиво призрев на ны, не попустит нам погибнути во гресех наших, но да возставит падших, да подаст исправление злому и окаянному нашему житию, от грядущих грехопадений восхищая, и да простит нам вся, елико сами собой или чрез других кого согрешихом мыслию, словом и делом, от рождения до сего часа. Ты, подвижниче добродетелей, отче наш Макарие, веси немощь естества нашего и тяжесть и скорбь времен настоящих, моли убо выну Господа Бога, да николиже нас оставляет Его неизреченное милосердие, но да хранит нас от мирских искушений, от диавольских сетей и от плотских похотей, да приимем от Господа Бога тобою и вся потребная к жизни временней, освобождение от бед и напастей, а среди их неослабное терпение до конца. Испроси нам у Господа Бога в мире и покаянии скончати живот наш и невозбранно преити от земли на небо, мытарств же и бесов воздушных и вечныя муки избавитися и сподобитися Царства Небеснаго с тобою и со всеми святыми, угодившими Господу Богу и Спасителю нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков.
Лик: Аминь
Диакон: Премудрость!
Иерей: Пресвятая Богородице, спаси нас.
Лик: Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.
Иерей: Слава Тебе, Христе Боже наш:
Лик: Слава и ныне. Господи, помилуй (Трижды). Высокопреосвященнейший Владыко, благослови.
Иерей: Отпуст
Лик: Аминь
Величание
Ублажаем тя, / преподобне отче наш Макарие,/ и чтим святую память твою, / наставниче монахов/ и собеседниче ангелов.
