.. Макарьевский листок №11 №11. Исповедание во святых отца нашего Афанасия, патриарха Александрийского

Внимание, откроется в новом окне. PDFПечатьE-mail

ФЕВРАЛЬ - 2008 
 МАКАРЬЕВСКИЙ ЛИСТОК №11 

Исповедание во святых отца нашего Афанасия, патриарха Александрийского

{mosimage}Иже хощет спастися, прежде всех подобает ему держати кафолическую веру, еяже аще кто целы и непорочны не соблюдает, кроме всякаго недоумения, во веки погибнет. Вера же кафолическая сия есть: да Единаго Бога в Троице, и Троицу во Единстве почитаем, ниже сливающее ипостаси, ниже существо разделяющее. Ина бо есть ипостась Отча, ина Сыновня, ина Святаго Духа. Но Отчее и Сыновнее, и Святаго Духа, едино есть Божество, равна слава, соприсносущно величество. Яков Отец, таков Сын, таков и Святый Дух. Несоздан Отец, несоздан Сын, несоздан и Святый Дух. Непостижим Отец, непостижим Сын, непостижим и Дух Святый. Вечен Отец, вечен Сын, вечен и Святый Дух. Обаче не три вечни, но Един вечный. Якоже ниже три несозданнии, ниже три непостижимии, но Един несозданный, и Един непостижимый. Подобнее, Вседержитель Отец, Вседержитель Сын, Вседержитель и Дух Святый. Обаче не три вседержители, но Един Вседержитель. Тако: Бог Отец, Бог Сын, Бог и Дух Святый. Обаче не три бози, но Един Бог. Равне: Господь Отец, Господь Сын, Господь и Дух Святый. Обаче не три господие, но Един Господь, зане якоже особно куюждо ипостась, Бога и Господа исповедати христианскою истиною понуждаемся. Тако три боги, или три господы глаголати кафолическим благочестием возбраняется.

Отец ни от кого есть сотворен, ни создан, ниже рожден.

Сын от Отца Самаго есть, не сотворен, ни создан, но рожден.

Дух Святый от Отца не сотворен, ни создан, ниже рожден, но исходящь.

Един убо есть Отец, не три отцы. Един Сын, не три сыны. Един Дух Святый, не три дуси святии.

И в сей Святей Троице ничтоже первое, или последнее, ничтоже более, или менее. Но целы три ипостаси, соприсносущны суть себе и равны.

Сице яко да по всему, якоже предречеся, Троица во единице, и Единица в троице почитается. Хотяй убо спастися, тако о Святей Троице да мудрствует.

Из Следованной Псалтири 


 

 

 
Читайте также: